काठमाडौं : गण्डकी प्रदेश सभाका सदस्य प्रकाशचन्द्र दवाडीले देश कोरोना कहरका कारण आर्थिक संकटोन्मुख रहेको तर सरकारमा रहेकाहरु कमिसन र चलखेलमा लिप्त भएको बताएका छन्। सांसद दवाडीले सरकारको ध्यानाकर्षण गराउँदै जनतालाई राहत दिनुपर्ने अवस्थामा आहत थपेको बताएका हुन्।
‘देश कोरोना कहरका कारणबाट आर्थिक संकट तर्फ अघि बढिरहँदा पनि सरकार कमिशन र चलखेलमा लिप्त हुँदै जनतालाई थप आहत दिएको छ। त्यसैले यस्ता कामहरू तुरून्त रोक्न र जनताका समस्या तुरून्त समाधान गर्न सम्बन्धित निकायको ध्यानाकर्षण गराउँदछु’ दवाडी भन्छन्।
उनले कोरोनले निम्त्याएको महासंकटको बेला जनतालाई राहत दिन छोडेर पेट्रोलियम पदार्थको मूल्य बढाएर आहात थपेको पनि बताएका छन्।
‘कोरोना महामारीले यतिबेला देश ठप्प छ। यस्तो महासंकटका बेला जनतालाई राहत दिनुपर्नेमा सरकारले अझै पेट्रोलियम पदार्थको मुल्य वृद्धि गरेर आहात थपेको छ। जनतालाई दैनिकी चलाउन हम्मेहम्मे परेको यस समयमा पेट्रोलियम पदार्थको मूल्य वृद्धि गर्ने सरकारको निर्णय प्रति खेद प्रकट गर्दछु ,’ गण्डकी प्रदेशसभामा प्रमुख प्रतिपक्षी दलका प्रवक्तासमेत रहेका दवाडीले भने, ‘पेट्रोलियम पदार्थमा मुल्य वृद्धि हुँदा नुन देखी सुनसम्मको मुल्य बढ्ने हुनाले यसबाट जनताको दैनिक जीवनयापनमा प्रत्यक्ष असर पार्ने हुनाले पेट्रोलियम पदार्थमा स्वचालित मूल्य प्रणाली लागू गरी तत्काल मूल्य घटाउन समेत माग गर्दछु।’
उनले किसानले युरिया मल समयमै नपाएको भन्दै सरकारको ध्यानाकर्षण पनि गराएका छन्। ‘साथै धान रोपाईं सकिएको लामो समय बितिसक्दा पनि सरकारले कृषकलाई युरिया मल आयात गरी उपलब्ध गराउन नसकेको बिषयमा पनि सरकारको ध्यानाकर्षण गराउँदछु’ उनी भन्छन्, ‘मल नपाउँदा धानखेती बिग्रने जोखिम रहेको अहिले किसानलाई तत्काल रासायनिक मल उपलब्ध गराउन माग गर्दछु।’
फेसबुकबाट प्रतिक्रिया दिनुहोस